MIZORAM A KA KAL TAWHNA TE...........

1.Rih Dil
 He dil hi mizo te rilru ah hian a langsar khawp mai,mitthi thlarau in kaltlang ngei a an rin avangin ani a,tunlai  kan rindan a thihna luipui kai kan sawi ang te pawh a ni ang chu.Kum 2006 khan excursion in Saiha atangin kan pan vang vang ani.A hmunah hian darkar 2 vel kan awm a,kan tawngtai a, thla te kan la ho ani.A kam vel ah hian dum nasa tak a awm a,ka chapal chu chirh ah ka ti tang tlat mai a,chhar ka tum chu ka pil tual tual mai si ka chhuak ta vat a, nunna ka chan teuh hle asin.A kam ah hian Buddhist ho pathian biakna a awm a.a ep chiah ah Rihkhawdar a awm bawk ani.

2.Phawngpui Tlang
Phawngpui Tlang hi Mizoram a tlangsang ber ani a, he tlang hi National Park ani nghe nghe ani.He tlangah hian  heng hi a awm Cheu hnar ngaw(hetah hian hruizik kheh in ka riak ve tawh),Areopaggi (heihi a tlangsang lai tak a khawthlirna sap ho hunlaia an siam kha ani,kan kal lai in leihlawn awm loh avangin thir pipe ah 5mts vel kan uai chho ani),Tialpari puk(he puk hi a mak dangdai ve khawp mai,mihring in a ker chawp te pawh a ang hial ani.Lai lal Cheural fanu Tialpari chu  a paten pasal neih tir an tum mahse ani hian a neih  duh tlat loh avangin Phawngpui tlangah hian a chho ta ani.khua a thim tawh avangin he pukah hian zan a riak a, an sawidan chuan sakei nen an inngheng lum a ni awm e.Tunah hi chuan a min then tawh a, a puk zah ve chauh a awm tawh ani,enkawl ngai tak ani.),far pak(hei hi hmanlai a far kung khat dinna ani,a nuam hle ani hetah hian thlenna tur bangla te pawh a awm),thlazuang kham(he kham hi a sang hle a,englai pawhin thli a thaw deuh reng a,kawr emaw thildang sakhat lo deuh thehthlak chuan alo let leh zel ani.),Pastor Challiana sathar kahna(helai hmun hi thengthaw nuam tak mai ani a.Hman deuh khan helai hmun ah hian Baptist pastor Challiana'n sathar a kap ni awm e.)

3.Reiek Tlang
Reiek tlang hi hmun nuam tak ani a,a tlang bulthut ah hian tourist lodge tha tak a awm nghe nghe a .A tlang bulah hian tourism ho siam model  typical village a awm nghe nghe ani.Tlang a lawn tur hian thui tak chhoh a ngai thin a,kan kal lai hian sipai motor kal kan hmu remchang a,kan chuang chho ani.A hmun hi nuam ve tak ani in tlawh tu pawh an thahnem ve hle ani.

4.Champhai
 Rih dil kan tlawh haw lam ah hian ka ni te hnenah rei tak ka cham a.Hemi chhung hian Chanem,leilet phai ah te,leh Lianpui khua ah te ka kal ani.He khua hi tunhma a Mizo lalropui tak Vanhnuailiana khua ani.

5.Lungtian
He khua hi Hmanlaia Chinzah lal Hausata khua ni thin ani.Hausata hian Halkha Lal fanu a nei a,inngeihtak a an awm laiin tumkhat chu a khawtlan ta daih mai a.An nu ko haw tur hian palai an tir a,a pa te chuan anlo duh awkawng lo mai a, mirang(sap emaw mingo) lu inlo ken loh chua inhruai haw thei lovang an tih tlat avangin Hausata leh a unaupa Dokulha te chuan Rangmati atang a lokal survey hotupa Stewart te chu va thawng thut in an lu an  la a, an nu koh nan an hmang ta ani.Hemi hnu hian Hausata hi a thi zui ve nghal a ni awm e.Lungtian ka kal lai hi kum 2007 khan ani a,a khaw luh dawn ah vaube leh fartuah te nauban te an lo par vul chuk a hmuh a nuam hle ani.

6.Fungkah
Fungkah tih hi a hming awmzia hrelo kan awm takin fung tih hi lai tawng a tumpang sawina ani a.Tumpang kahna anih chu.
Tunah chuan Fungkah khua hi a awm tawhlo a ramhnuai mai ani ta.Kum 2001 a ka kal ve lai chuan Lungpher khua atang ke ngatin kilometre30 vel a awm ani.He khua hi kum 1995 kum khan a min vak a, an thlan te pawh a min tel in a thlang chhimtuipui ah a zu khuap ani.Hetiang anih avangin sorkar remruatna angin Siachangkawnah an pem ta vek a.Hemi hnu hian in 30 vel chu pem duhloin an la awm lui a,mahse motor in a pawhloh avang in an awmsawn ta vek ani.He khua hi Lai history ah leh Mizote history ah chuan hmun a luah zau hle kan ti thei ang,Chinzah lalram hmunpui anih thin avangin.An lal Dokulha kha mi rorum tak ani a,vaitawng leh mizo tawng pawh thiam tak ni a sawi ani.Indona avangin British ho khan an man a Andaman ah an tan tir hial ani.Hemi hnu hian a chhuah alo hun a,tang rei a inti bawk a niang kutsil nan tiin guard pakhat chu a vawhlum a,a damchhungin a tang hlen ta ani.

7.Lungpher
He khua hi khaw pawimawh tak helai tuichhak bial awptu doctor thuthmun ani a,middle sikul 2 leh high sikul 1 a awm ani.He khua hi Dokulha fa naupang zawk Suichhuman kum 1918 a a din ani a, tunah hian in 260 vel awm in mihring pawh 1500 lai an awm ve ani.Lal rorel lai kan Phawngpui tlang hi (a sang lai ber)  Lungpher lal awp chin ani a,Fungkah nen Minlui ah an inri a,Mara ram nen Tuilehluang ah an inri a,Bualpui Ng nen Ramri luiah,Vawmbuk nen Siachang lui ah an inri a ni.Lungpher khua hi Phawngpui tlang bulthut a awm anih a vang in scenary a nalh hle a,chawlutar(phawnpui tlang hnuaia tlang tesep pakhat) chu PHC atang a nalh hle ani.Tunhma a an lo awm tawhna thin khawhlui tlang chu mizoram forrest in an chei a,far te phun in hmun nuam tak leh tlawh tam alo ni ta ani,helai hmun hi a mawi dangdai ve hle ani.