KA NUNAH THLIPUI A TLEH CHIAM A...

Lalpa thlipui a tleh chiam a,
Tuifawn te pawh a sang hle;
Khua nasa takin a dur khup a,
Hliahkhuhna a awm lo ve.
Kan lawng tunah a pil dawn hi,
Nangmah i muhil si;
Boral ila pawi i ti lo vem ni,
Tho thuai la min chhanhim teh;
Thli leh tuifawn in a thu an awi,
     'Bang rawh u,'


Ka nun ah hian harsatna chi hrang hrangin min chim vel thin a, a chang chuan kal ngaihna reng ka hre thin lo ani. Buaina a zual deuh deuh a, ka nun ram hian pui tu a ngai hle si a, Lalpa ka auh lahin a reh vung vung ni te hian a hriat mai si, tunah chuan a mangan thlak zual ta. He sual tuipui ah hian ka pil dawn ta anih hi tih ka rilru ah alo lang a thlaphang takin ka awm ani. Ka thlarau nun chu tuifinriat zau tak a, lawngchhe tur ang mai ani a, a hlauhthawn awm em em ani. Lo thi ila khawnge ka kal ang, ka thlarau nun a him tlat lo, a langa fel chu a awl teh meuh mai chhungril lama famkim thei si lo. Chutia hlauthawng tak a ka awm lai chuan ka rilru ah thil pakhat alo awm zawk a, ka nunah hian Lalpa hi englai pawhin a awm reng a, thlemna k tawk emaw harsatna ka tawk emaw minpui tur hian lawng ka chuan na ah hian a awm reng a, ka lo kaihthawh loh vang ani tih ka hre ta a. Thlaphang mangang takin Lalpa chu tanpuina ka dil a, ani chuan ka chung a thlipui nasa tak lo thleng chu a hau ta ani. Hei hian ka rin a hian tanpui kan ngaih lai hian a inpeihzia min hrilh chiang hle ani.


Thlipui tleh mahse tui ti fawn in,
Khawdurte, khawpui te, kawlphe engmahin 
Lawng a tichhe thei lo lei leh van lal
A chhung a awm kha ring selangin
A thu lawm takin an awih fo thin
Bang rawh u


He hringnun kalkawng ah hian a chang chuan bawrhsawmna leh harsatna tawh chang alo awm thin a, chhungte thih hun alo thlen in kan lungngaih a zual thin. Engahmah mangang suh u, a tihlai in mihringte hian kan theilo fo thin ani, Ka awmpui reng ang che u titu hi a pangai reng. Ka nun a harsat na lo thlengah mangang takin ka awm thin a, a chang chuan rinhlelhna lian takin min nuai vel thin a. Rinchhan tur keimah a awm ka rin loh thin avang ani, Lalpa hi a changin reh vung vung angin lang mahse ka nunna derthawng khawp a thlipuiin min chim hi chuan a hnai lutuk a, kan kiangah a awm thin ani. He hun khirh tak ah hian ka nun a Amah awm chu ring mai ila chu hau lo mahse he ka nun lawng tichhe thei thil hi ka chungah a thleng lovang, ka chhungah hian awm a awm a, ka chhung a lei leh van lal hi thlipui in a nuai ve ang maw teuhlo mai. tuipui chu fawn mahse lawngchhiatna khawpin a thilsiamin an khawihtheilo ani. Harsatna te ka nunah nitin in min chim thin mahse lei leh van lalber keimahni ah a awm tih hre leh ang u.




Lalpa lawng ang mai ka nih hi,
Khawvel a ka awmchhung hian;
Boralin ka inring fo ani,
Tanpui lo thlen hma loh chuan
Thlemna hi thlipui angin 
Ka chungah a thleng thin 
Tuifawn chung anga nghet lo ka kal in 
Van thlen theihloh ka inring
Thlipuite hau angin hau reh ang che
       Bang rawh u


He khawvel tuifinriat zau ah hian, rinna derthawng takin ka kal bek bek thin a, thlemtu hian ka derthawnna lai chu hmu fuhin nasa takin min bei thin ani. Tuifawn hian nasa takin min vawr lawp lawp a, ka lo chau hman mai thin ani, ka duhna tak a min beih thin avang leh manganna ka tawlai hian min beih thin avang in tuipui ah ka pil thelh thelh ani. Ka nun ram khawro tak hian a chang chuan vanram a hlat hle te in ka in hre thin a, ka nun hi a tuihal ani ber e, hek a nun a tuifawn te hi Lalpa min hau reh sak ang che.


Ka thinlungah lawng a awm ang khan
Nangmah i awm fo,keimah min tanpui nan,
Chuvangin thlemna setan engkim
I hau reh thei nangmah ringin ko ilangin 
Min do khawdur te hau reh ang che
       Bang rawh u.


Heng thlemna lakah hian Lalpa nangmah keimah ah i awm sia, chuvangin min hre reng ang che, i mite kan ni si a. He ka nun a harsat na lo thleng thin hi ka pilbo mai phal suh la, engkim in i thu an awi thin si a, chuvangin min chhanhim ang che.He ka nunna ah hian engmahin min tibuai tawh suh se keimah ah hian Krista a awm si a, ka tih theuh theih nan Lalpan malsawm rawh se.........