LUNGAWINA

Lungâwina hi enge ni ang le, lungâwina kan han tih hi chuan thinlung a lawmna, chantawk a lawmna, thil engpawh lo thleng se thlirna kawngdang a thlir tu te an ni ṭhin. He khawvel dan ah hian lungawina a awmlo kan ti thei ang, a changin inrem ṭhin mahsela rei a daih ngailo a ni. Lungawi tak a nun hi a hahdam mai ni lovin a hrisel a, mi hrisel lote hi an lungawi mawh khawp mai. Chutih rualin Lal Isua a awm te erawh chu harsatna ah pawh an lungawi thei lawi si a ni. Kan nitin hun hmandan ah hian kan thiltih te hian lungawina min pe tawk em le? Tih te hi chhut tham tak a awm ṭhin a ni.

       Thenkhat chu kan thatchhiat avangin lungawina kan hmu ṭhin lo a ni. Thatchhiatna hi mahni rilru nawmlohna thlentu leh tuma thlamuantheih loh natna thlentu a ni, Pathian in a haw em em bawk a ni. He natna hi dawngdahna leh pachhiatna kengtel nghal a nih avang in natna hlauhawm tak a ni a, tihdamna lah chu a vang mai mai khawp a, vawikhat thatchhiat inthlahdah tawh laklawh chu sim mai theih a ni lo. Lungawi tur chuan kan hnathawh ah a rah kan hmuh a ngai a, chu chuan kan lawmna a tizual ṭhin a ni. Mizopa chu lo neiin eia zawng ṭhin a ni a, kum bul a ṭang in hah tak in a thawk a, kum tawpa rah chhuah chu hlim tak in a seng ṭhin a, mi neih a awt ve tawh ngai lo a ni, chu chuan lungawina a pe thin. Chutiang bawk chuan zirlai te pawh kan han zir ṭauh ṭauh a, chapter khat han thiam vek te hian kan lawm em em thin a nih kha. Kum tawp exam result ah rah chhuah chu a lungawithlak em em thin a ni. Hetih rual hian thenkhat chuan in vawiin a tih tur te nidang a tih ah kan khek thin, kan tihloh a thildang nuam zawk kan tih khan kan rilru a nuam chuang lo. Kan tih loh ho kha inchhekkhawl zel a, lungawilo tak in kan thlir liam a, kumtawp result lo chhuak chu a lungawiloh thlak hle thin a ni. Kan hna khan lungawina min thlen hek lo le. Lungawina hi a man ava sang tehlul em, mitin banphak ah a awm reng a nimahsela a aia lungawi zawk a awm kan beisei vangin lungawina kan kalsan chang a tam viau a ni. Mithenkhat chu kan vannei viau thin a, thiamna inang reng ah pawh vannei bik te kana wm thin a ni. Chutiangah chuan vanduai zawkte chu an lungawi lo duh khawp mai, khawvel a ni miau a thuhmun thei si lo le. Tunlai khawvel ah hian mahni hna a lungawi viau si, thiante hna a lungawi lo kan va tam ta em . Lungawi tak a awm ai chuan nawrh kan thlang ta zawk a, hei aia ngeiawm chu nuar angreng nuar lo ang deuh chi ho pen down strike an tih hote hi an ni a, lum si lo vawt si lo a vuihmui pu ho te an ni, an khawngaihthlak khawp mai.

Tumkhat chu lungawina ka ngaihtuah laiin Paula nundan vel ka ngaihtuah chhuak a, kha nun kha ava awhawm tak em. Riltamna hmun ah pawh puar tak leh lungawi tak a awmdan a thiam mai te kha khawvel pek lungawina hi chu a ni lo phawt ang. A ngaihtuah let ngei ang a a pianthar hma kha chuan Jerusalem-ah pawh mite zahkai dan thiam nisi in chuti tak em a han pachhiat tak mai chu tiin, mahse a thinlung chu chhunkhhahin a lo awm ta a. Engkimah a lungawi zel tawh mai a ni, Lal Isua tirhna a nih tawh chuan kawlbun te chu a nep a ti tawh mai a ni. Keini hian eng ang lungawina nge kan zawn ve le. Thingtlang khaw pakhat ka kalna a kan thlen in te chu an in hmangaihin an hlim em em mai a ni. Nitin inhlawh leh lo ah hna thawk in an awm thin a, zan lamah erawh an hahdam chiang a ni, an chhungkua ah inhauhna in hmun a changkhat viau a ni awm e. An pa ber kha chhungkaw tan ava hlu ngai em, mihausa ten chhungkaw lungawina an pek aia tlem chu a pek loh bik ka ring lo a ni. An in maurap in mai atang khan vanram a lang hial in ka hria. Lalpa chenchilh chhungkua khatiang ah kha chuan naupang an sual mawh khawpin ka ring ve mai mai, a chhan chu Pathian in setana khawihchhiat mai mai a phal lovang.

Ka mi ngaihsan em em Lalruali kha chuan he nun hi hneh theih loh nun tiin a lo vuah ve bawk a. He nun hlutna hi a hre chiang a, leiah hi chuan nuam takin a awm theih loh a, chuvang chuan lungawi tak a awm te chu mi nihlawh nihna a ni tihte hi a nun a tang in kan hre thei a ni. Thlemna chihrang hrang leh a natna tawrhna hmangte in he a lungawina hi sawinghin in a awm thin . Mahse Gathsemane huan a ngaihtuah thlen chuan a lungawihlohna nep zia a inngaihtuah chhuak a, amah a inhmu hniam leh a ni, tichuan lungawina diktak Lal Isua chu a dil a hrehawm mahse i ta ka ni Lalpa tiin lungawi tak in a lo awm phah ta a ni.

Engtinnge keini ho hian lungawina kan zawn ve thin le? Lungawina nei tur chuan Lal Isua a ngai, he khawvel ah hi chuan mihring duh chin in tawp in tai a nei dawn si lo. Lal Isua a lungawi te hi mi nihlawh ber te zing a mi an ni, Lal Isua bul a an khenbeh pa kha a lungawi khawp ang, a tuarna pawh kha a hre chang tawh lo mai thei a ni. Kha lungawina avang khan chhandamin a awm si a, a sualna te a ngaihtuah chhuak a suamhmang leh tualthah hmang a nihna te chung lakah chuan an bula an khenbeh pa kha a ngaihtuah let chhin a, a lungawi hliah hliah. An hremna kha nep a ti tawh lutuk. Hmanlai indo thinlai khan lalbula thih kha chu chawimawina ah sipai huaisente kha chuan an ngai a, an lungawi thin a ni. Mahse lei leh van lal ber meuh a bulah misual bulah chuan a lo thi ta si a, a phu lo tih a hriat in hre reng tur in a chah a nih kha. Lal Isua khan a chanchhiat lai a lo khawngaihtu leh lo pan tu chu a hnar lo a lo pawm in a hnukchah dawn in mi lungawi ber ah a chhuah ta a ni. Keini hian khawi atang in nge kan in teh ve thin le.