Zan khat chu thian ho in kan titi a, thlahrang chan chin leh supernatural thil vel kan sawikhawm a, kan thil hriat te kan in share khawm ani. Hemi zan hian ka tawng muan em avangin thiante beng tih tlai loh hlau tak chung in sawi ve lo in ka ngawi ta zawk a ni. Heng thil te hi kan Pathian awm ti chiang tu an ni a chuvangin kan sawi anih pawh in a tha zawng in kan kaiher hram hram tur a nithung ang. Engkimah Pathian ropui ber zel rawh se, chuti lova mi hlauh tur ang a kan sawi anih chuan setana kan ti lawm ngawt ang.
Kum 1999 kum khan class iv ka ni ve tawh in ka fel ve tawh hle a, kum 10 ka nih kum a ni. November thla ah kan exam a, kan khua hi Primary School centre hmun anih avangin a chhehvel a khua Rawlbuk, Siachangkawn, Fungkah leh kan khua a sikul pathum te kan exam a ni. Exam te kan zawh hnuin khual khua ami te chu an haw darh ta sang sang a, lung pawh a leng ve duh phian
Chawlh laia chutia khawchhung a awm reng chu a ninawm tiin ka chhungte pui tur in lo ah ka riak lut ve a. Kan lo ral lehlam chiah chu kham vek hi ani a, a min reng thin avangin thawm a dai vak ngai lo a ni. Kan lo awm na hi Phalhrang ram mitthi khawhkham hnuai, a ral chiah Fungkah ram ni thung si a ni a, kan khua atang a 20 Km vel ta hla ah a awm a. A hlat tham em avang hian riak lo chuan kan kal ngai lo a. Kan ral a kham chu kan lo nen a inkar ah Minlui chu a luang tlang ani. Chuta ka riak ve ta chu nuam ka ti hle mai a, a chang in thiante loh te kan leng thin ani.
Buhseng hunlai vel chuan ka nu leh pa te an in damloh chhawk deuh reng a, min pui tur in kan chhungte pawh chu an lo kal ve a ni. A huho chuan kan thawk sawt ta khawp mai a, nuam kan tiin kan hlim ve hle ani. Zanthla engah hlim takin fasuar chung ah kan lawn a lam pahin buhte kan chil thin a,buh tin 500 lai kan thar ve a ni. Buhseng kan zawh tawh hnu chuan ka pa te nen lui ah kan kal hlawm a, sangha man tur alo tam ang reng khawp mai a, kan man ho chu tlai chawhmeh atan kan hmang nghal a, a tui khawp mai ka la theihnghilh lo. Chumi hnu chuan ka aia upa daih ka pa kawipa ( mizo ah chuan thian sabeng an ti) fapa nen chuan haw dun tur in min ti a, an ni ho chu an la riak dawn thung a ni. Buhfai kan phur khawp tawk kan phurh hnu chuan haw tur in kan chhuak ta a ni.
Chutia kan kalzel hnu chuan ngawpui pik deuh hmun ah kan lut a, helai hmun hi chu chhunah pawh a thim khup thin kha ni a tlailam dar 5 velah phei hi chuan a hlauhawm ve hranpa hrim hrim a ni. Hetih hunlai hi ka intih huai lai ve deuh anih avangin ka inti pachang lui a, ngaw kan kal chhuak chu ka thaw dep dep mai ani. Kalkawng hi a hahthlak hle mai a, a chho si kawng a te bawk sia tlailam ah chuan kal har tak hi ani. Reilo te kan kal leh hnu chuan mau hmun ah kan lut leh a, kal fimkhur a ngai lutuk a, a nalin a awih bawk si a, tlak mai awl tak hmun hi a ni.
Phalhrang kawng kan pawh hnu chuan rilru a veng hawk a, kan chauh deuh tawh avang in reilo te kan chawl a, kan buhfai ah chu kan bar dun leh rih a. Kan kal leh hnu hian ka hlauh ring in fiamthu te min thawhpui vak vak a, an naupan laia alo huai thin zia te min hrilh a, kan kal sawt ta hle ani. Kawng hi chho vek nimahse kawngpui kan pawh tawh avangin kan thla a muang ve em em a, hla zai pah in kan khek ve tuar tuar mai a ni.
Zan dar sarih vel ani tawh a, a thim tawh a kalkawng erawh chu ala hriat theih thung. Hetih lai hun hi Krismass a hnaih tawh avangin mi hote chuan mamawh an la nasa tawh hle a ni. Chutih lai chuan kan thlang luikawr kan awmna atang a 500 metre vel tur ah chuan chiang em em hian thawm alo awm ta a. Chu thawm chu kan ngaithla chiang a, alo chhuahna kha ngaw vek a ni si. Thawm awmdan chu khuang nen an zai a, an tui ve hmel khawp mai. Hetia an zai zo hi an zinga tu emaw ber chuan thu a sawi ta a ni. An tawng hi Mizo tawng an hmang lova, kan awmna bul vel a mite ho tawng lah ani hek lo. Hlauhna chang pawh hrelo tak chuan ka awm a, ka u chu thil awmzia ka zawt a, ani chuan thil ho mai mai anih thu in min chhang a. Zawt zui ta lo chuan ngaihthat loh na pawh nei chuang lovin kan haw ta ani.
Thawm chu a ngaiah ala awm reng a, keini chuan kan kalsan ta ani. Kan hma ah chuan kan khaw thlan hlui a awm a bung kung lian tak tak a tam avangin a thim khup thin ani. A bulah chawnpui a awm a, a dawtah chuan lal pura vel te a awm leh a, thlan lung sang deuh deuh indawt zul in an ding hlawm ani. Helai hmun hi chu nidangah pawh ka lo tih ve em em kha a nia hemi zan zet hi chuan a hlauhawm dan hi a namai lo hle ani. Thlan awmna hmun hi ruam ang hian a awm lehnghal a, khawthim tawh hi chuan pelh a huphurhawm em em ani. Helai hmun hi chu hlau chung chung in kan pel thei ta hram a. Tunah zet chuan hlau tur ka nei ta lo, chu tih laia ka lawmzia mai chu sawiin a siak lovang.
Kan naupan lai hian kan rual u te hian thlan bul vel hlauhawm zia an sawi thin a. Pasaltha pakhat pawh thlan bul atang in ramhuaiin a zui a niawm e, chu pa chu a thau ah a man a. Hawilet lovin in a thleng ta e an ti a. Chungte rilru ah alo awm bawk nen khami tumzet kha chu ka hlau ve khawp mai.
Kan in chu dar 8:30 kan thleng ta a, thlan kan pelh hnu kha chuan kan kal chak bawk ani ang kan phur pawh kha a rit lo in kan hre vek ani. Ka nu hnen a ka sawi chuan in a awm ho chuan an lo awih vak lo a ni ang an lo ngaihsak vak lo a. Chutiang chu anih avangin keipawh chuan engemaw mai mai anih ka ring leh hnuhnawh ta a. Mahse ka kalpui ka cousin chu kan thlen zan atangin a khua a sik nghal a, keipawh khan ka hlau ve khawp mai. Hmun thenkhat ah chuan Ramhuai hote pawh hian khawmpui an nei thin anih hi ka ti ta a ni.
No comments:
Post a Comment