Awle hei Pathian khawngaihna vang liau liau in B.Arch chu kan zo ve thei ta a, a kaihhruaina ka chan tawhna te han thlirlet chang hian lawmthu sawina chang ka hre lo zawk hi ka inthiam thin lo a ni. Pathian zarah nangni pawhin tha tak a kan aia sang zawk leh thiam zawk a zo tur in duhsakna ka han hlan che u a ni e. Pathian min kaihhruaina tlem a zawng han hrilh ve che u hi ka duh a chu chu Ama ropuina atan nise.
Mizoram ah pawh chhimtawp ah Lungpher khua ah ka piangin ka seilian a, ka nu leh pate lo nei a eizawng mai an ni thin. Kan unau hi panga kan ni a, a laitak ka ni. Midang ho hi pumraw tha leh zah kai tak an ni hlawm vek mai, ka pianhmang atang chuan Pathian bak beisei tur ka piantirh atangin a awm lo. Thian kawm lovin inah lehkhabu leh Bible te ka chhiar nasa em em a, chu chuan finna lamah min puiin kan khaw naupang ah chumi kawngah chauh chuan mi aia ka chungnun vena awmchhun a ni. Ka awbawm a chhiat em avangin sin leh muang deuh deuhin ka tawng thin a, miin min zirsak fo a, ka chhungte rilru pawh a nah le thin. Mahse thian tha ber tih theih tur tunthleng hian nei lo mahila Lal Isuan engkim min pui thung a. Inkhawmna ah te inthlahrung deuhin mi rual in hl aka sa ngam lo a, mahse mi hriat lohvin ramhnuai ah kal in hlate ka sa a, ka thla a muang hle thin a ni.
Leimin kum a nia vaimim ringawt chaw a rin hunte alo thleng a, chutiang chung pawhin ka lakah chuan Pathian that ngai in ala that ho thin. Miin min enhniam mahse exam naah mi aia hnuaiah ka awm ngailo thung a, mahse han thlengsang tur chuan tumahin min beisei ngai lo a ni.
Saiha ah kan han kal a, keini thingtlang atang a lokal chu min dah hniam na chin alo awm leh ta zel a. Ka la hriatreng chu kan zirtirtupa in kan class zawng zawng zingah keichu min melh pah a, “ In class ah hian pakhat tihloh chu nupui/pasal hmu vek tur in nia” a tih ka la hre reng. Middle sikul kal laiin sport kal ka chak lutuk, mahse ka u te hovin miin min hmusit ang tih hlauin min kaltir phal lo. Mahse miin an hriatloh Pathian awmpuitu, ka ngaihsak loh lai pawh a min awmpuitu ka nei tih tumahin an ring lo. Ka nu leh pa sawi chhiatna ni lo se, unau te zingah pawh a ngaihtuahawm ber tur tih an ngaihdan a ni, ka demlo mi zawng zawng ngaihdan a ni.
izawl ah kalin kan khua ami te min endan a han sang leh hret a, science ka la tur pawh hi hriselna avang a la lo tur a min tih hnu class pawh arts a ka zawm fel tawh hnu ah engemaw tiin science ka la leh hram a ni. Science ka la hi Pathian remruat a ni ang chu, amaherawh taksa peng engemaw ah fellohna nei reng mahila tun thleng hian han nat em em hian ka awm vak lo. Hriau a inchiu hi ka hlauh vang nge chhiar tham chauh chiu ka la ni. Heng te avang hian Pathian hian midang ai hian min lo khawngaih em a ni. Engahmah a laktlakloh hetiang khawp ka lo ni hi a ropui tawh hrim hrim a ni.
Tawng Mizotawng bak thiam mumal lovin Hyderabad ah ka lo chhuk thla a, kan u te ho an lo fel em em a, ka classmate te an lo fel em em bawk a. Hmasawn har chi ka nih em avangin lawmthu han sawi vak ngaihna pawh ka hre chuang lo, ka lawm a ni tih an hriat tho ka beisei.
Vaiho te zingah ka han tal tak tak a, min enhniam chu awm tho mahse engvakah ka ngailo, vaizingah pawh kan thu thu a awm ve pawh an awm ve nual. Hriat ngailoh zingah pawh puitu tur a dah teuh. Ka fel loh lai pawhin leh hostel a vaiho zingah pawh min pui hreh miah lo tamtak ka hmu a, Pathian vang chauh a ni. Kum 2 na leh kumthumna kha ka che bawi ve deuh a, mahse daltu a awm leh thin, ka tih hlen phal lotu an awm tlat thin a ni. Ka thatchhe hle a, design pawh nili bak ka tingai lo, jury na ah thlanhluam in kan e hman hram thin a ni, heng avang hian pass mark chiah chiah hmuh chang ka ngah mai.
Thesis tih hma kum atangin ka huphurh tan a, tihngaihna vak a awm chuang lo hunin a rawn inher pui mai a ni. Thesis tih tantirh atangin ka han buai tan a, vanduai a kaltluang dawn nih hi tiin ka han bei chho ta kha a nia hna a sawtlo fu a ni. Ka huphurh ber mai case study chu mahni in ka kal a, Pathian in minpuih zel a min puitu pawh min pe zel bawk a ni. Final jury neih hma ni karkhat vel ah pawh min la mangan pui a (a chhan chu college campus design a ti hmasa ber ka nih avang leh min puih theih vakloh vang a ni ber mai.) Vanneihthlak takin external ah fel deuh kan panel ah lokal in kan HOD in min lo duhsak bawk nen ka phu aia tam min pe ta zawk a ni.
Min hruaina khi min han thlirlet pui ula Pathian hi awm lo tit i mahsela keimahah hi chuan a nung a ni. Min hliahkhuh a, ka mualphona tur ngawih ngawih ah pawh min thup tlat thin a ni. A faka nih tlat avangin thil ka tihsual pawhin min hrem mai, min chawichhuak leh thin zawk a ni. Ka hmalam ah hian ka aia tha hlir mithiam an awm, mahse ka hmalam hunah pawh hian Pathian in minla hliahkhuh zel dawn a ni, min kalsan dawn lo a, miin min hmuhsit tawhna hmun apiang ah min la chawisang zel zawk a ni, a ti a, a ti zel bawk ang a, mite tanpui thei khawp a min siam hma chu min dah lang dawn a ni, a ropuina turin chu chu ka ring tlat a ni. A tir a min enhniam tute pawhin B.arch ka zo fel meuh chu an lawm ve ngang a ni ang “ Nang hi unau te chehral tur/laktlak loh ber kan tih kha PATHIAN TANPUINA avangin kan khua ah chuan mi theihloh thei I ni ta”, min ti hlawm a ni, keimah vang a Pathian an fak hi a ropuina tur alo ni zawk a ni.
No comments:
Post a Comment