HNAM TAN A PASALTHA

HNAM TAN A PASALTHA

Ram tan a nun hlantu
An zal e, piallei daiah
An sakruang mawina

Zamral e, Zoram tan

A ral si lo in sakhming
Duhawmna a lengvel e
In hmingthan mawina te
A thamral lo, Zoram tan

A mi leng in an sel e maw
Kei ka sel thiang nem maw
Ka seilenna tur vang a
Thisen hlantute chu

Ka nuam ve e dawi ang dawm
Zoram tan enge ka tih ve le
Ka nei nem maw tih ve
A tlem lua e, an tawn a'n

Thiamna lo sangzel in kan vul
Par kan chhuang ve e
Kawlkil kan vel, mahse
Chhingzo an awm nem

Sakhming mawi chulhnu
Kan hnam pasaltha te u
Kan chhuangin kan zah che u
In iang par kan nuam e

Hrilthiam ila tawng chikimin
In thisen hlutzia leh mawina
Hrilphak imaw in mawina
Ka chhut seng lawng e

Hmatiang kan thlir ve ta Zofaten
In hmathlir kan persan ta
Unau inhal intai insual
Kan inthen engtin ngai u maw

Martarte thisen lengvel chuan
Aw rauthla chibai kan buk e
Kun a Lalpa zawnchhuah ram
Chibai bukin in fam si maw

Aw hmun hlut awm leh mawi
I chhungah pasaltha leh ropui
Thisen a luang e, an sakruang nen
Zofaten kan chhuang em a che.

Zoram tana nun hlantu
Dokulh Khuangcher lalhlei
Kan chhuang in kan zah che u
Chhawmzel nange in iangin.

Kutdawh

Kutdawh

Ngaiteh, A rum vung e chhimthlipui
Sik khaw dai zantlai karah
An bel kawmkar up leh runpui

An silh puanlum an chhem meialh
Zuksial ramva tin lawi an run
An kai nungcha leng an bukah
An bel e hmul leh runlum
An dawn nem run lo riahremna

Mahse, tuardai thin sik khel lo vin
A zawngvel tuam lumna run
A riahrun lampui tluang sira'n
Hakpuan awm nem maw silhpuan lum
A khur e vawt leh riltamin
An pel e mi fel leh tha ten
An pe lo eitur leh puan lum
Kutdawh misual iang an lungten

An kai, Angel ten kutdawh chu
An lawm e kawrlum leh runnuam
An hlui ta chawtui leh sahmui
An hlim e vankhawpui an lawm
A lum e kawtthlerah a taksa
A ngai nem a lei rethei taksa..

Mahse

Mahse….  VL Hminga

Mami, he lei mawia’n I lo seilian a
Mahse chunzua unau tah titamtu a’n

Mim ang lo seilian e
Duat lai lawmlai Lalrammawi
An ko che’em kei ka duatlai
I sakhming an Mami tiin duatten ko ing e.

Thiam zirna run in lian
Bel a riahrun I remlai pawh khan
Kan chhing nem zanmu muangten
Tawngtaina a I sakhming lam zel hian

Beiseina aw beisei
I lenrualten an duhtawk nem maw
Lalrammawi I sakhming an belh
Halelui leh mami ti a biahzai anka

Kan phulo a sin le
Lengdang tawn a riahru I rem mai tur
Kan phal lo kan phl mawlh lo
Mahse hmangaihtu tiin I pan le.

A ngui ruai e vangkhua
Min sunpui ru ka tuai duhlai
Aw thihna I hnehna chu khawiahnge
Hnehtu ila tawng dawn si

Siamtun min pe khawvel a a ram mawi turin
Mahse a la ta van lal ram mawi turin
( Lalrammawii @Mami Nghilh loh nan..... )

KHAM KAR A SEN HRI PAR

KHAM KAR A SEN HRI PAR

Kham kar a senhri par
Vullai rel tur a khuanu duan
Mawiten alo par

A zu vahkhuaiten lo dawt dun

I Phentu thing zarmawi
Lentu khamrangten lo chawi vel
Aw Chawitu hmun mawi
I karah tharsa ten len lo rel

Vahram tuanni chuan e
Ka thir thin e bukthing zar hnuai a’n
Mawi leh rimtui lengvel
Hahdamna leh lunglawm a’n

Kham kar a senhri par
Aw di te ka lunglawmna I ni
A lengvel duhawmna par
Phentu chunzua ni bawk si

Kham kar a senhri par
Par dang zawng zawng aia duhawm
Kawrvai rose aia senhri par
Chhingzo ngei siamtun mawina a thuam

Kawlrawn pawh vai mah i
Nang chhingzo reng dar dang awm maw
Kei ka lunglai luahtu I ni
Thanzo lanu iang a par duhawm

Kham kar a senhri par
Chuailo ten vullai rel teh la
Furtui lian leh khuangruah sur
Kar ah hian ni rei han cham teh la.

 

Zoram tan

Aw kan Zoram nuam leh mawi
I hmun i tlang a mawi mang e
I chhungah naufa zaleng tual chai e
Partin an vul chiai, ngaknu an mawi
Hnuntui a thianghlim e hnamdang hawihin
Tlawmngaihna leh zahawmna thamin

I chhung a leng hnam ropui Zofa
An duai bil lo an do an sat an chhan
Thian tan nun an hlan thih huamin
Rinawmna leh dikna a thangvel
A par rimtui lo dawn ve u lengzawngten
Kan Zoram nuam leh mawi hi

A chuai ta maw nau ang nuihni
Kutni vangthla pawh ur hman lo in
Hnam dang bawih a tan mai hlauvin
Ram hmangaihtute an chhuak ta si
Tlang a ngui ruai e duhlai an then run nen
Hnutiang an hawi lo an kal zel e

Doral kianni her mawlh si lo
Chunnu a mangang zua bang bil lo
Hriatloh ramdai ah chin hriatlohvin 
Engtin awm zel ang maw an hrai chu
Zanmu chhing lo hmangaihtu mengmawii
Dar ang intawng leh ang i maw

An tiam dun thenloh biahthu di
Parte aw ka hmangaih ber i ni asin
Zaleng zawng zingah nang ai tha
Ka tawng bil lawng e tiin an hlan e
Zing tian bawhar lo pau e thenna ni chu
An dang zo si lo hmangaihtu 

An ngir e dai lungrawnah chuan
Pawm vawng vawng e leng i mittui nen
An inthen ta intawng leh ang i maw
Inthlirliam ta thlafam iang a thlahin
Na lo fa awm ang maw hei ang damlai pialral
An liam e zahlei mual hran ah

A thlir thin chhun nitin in 
A hmangaih tawh nan dairawn ah
Kumsul a vei hriattur biahzai awm lo
A nghak e famthu thlen hma loh chuan
A thlirkir e chhuahtlang hmunhlui chul hnu
A far ta e thlafam lusun iangin

Ram leh hnam tan tiin an kalzel a 
Bawn pik riltam hliampui leh damloh
Kirzai rel lo ten an pen zel e ramdaiah
Riahrun an rem e thing zar hnuai ah
A ngai nem maw an runnuam hmangaihna
An hmangaih Zoram vang maw lo ni le

Lengin a thlir tlaini tla a chhiar
Vai an lo lian e doral an hrang e
An hruai ta leng i tlang hran ah
Engtin ngai ang maw valnem a khan
Khua an khawm ta e lung a zing ngei mai
An tap an rum e chhantu ngaiin

Val an a chhuikir e an vangkhua
A ngui riai e, an run hmunhlui
Zuva leh leilenten lamtluang an rem
An vangkhua chulram mai ni tawh si
A thlir biakbuk kang bang engtinngai maw
Har a so ve thinrimna nen kawp in

Lengin lo nghak e khua hran ah
An hruai ta tun chhan ngam si lo
Hmeltha zaidam leh hmeltha chu
Chhantu neilo hmelma hual vel kutah
Hmangaih loh leh lengdang hraichawi ai chuan
A fam ta e hmelma riahrun kawtah

A hre nem maw valnem a chuan 
Hmangaih Zoram tan ti a kal in 
A pu e awlanpi leh talhfiak kengin
An bei zam lovin mahse an tlem si
An chhat ta vala nunna Zo lui bulah chuan 
A hlan e a thil neih zawng chu

Famkhua an intawng leh ang imaw
Hmangaih vang a famhnu martarte
Parthi ka hlan e duhsakna nen
An sakruang Zoram leitha 
An hming mawina thangthar te tan nise
An hmel a tha e Zoram tan

Hun sulthum a liam zo ta e
Remna lamtluangah intulut e
Nghilh zai an rel ta Zoram luahtuten
An duhtawk nem an sel an hau an raui
Kei chuan ka lainat asin aw Zoram hmangaihtu
Piang leh ngam hian ka ring lo.

Van taksa

Bible hi ka thlir ve thin a, study Bible bakah ṭawngṭaina nen a ka neih chang pawh hian mi thenkhat thusawi hi chu ka hnial chak deuh thin. Tunlaiah thlarau chauh vanram kal tur a sawina ang chi phei hi chu zirtirna diklo ni hial in ka hre thin. A chhan chu Lal Isua hi thawh hmahruai anih tlat avang a ni. Mitthi thawhleh hnuah hian ringtu thlarau chu Pa angchhungah a chawlh ka ring a, misual te erawh hi chu an chawlh ka ring hran lo. A chhan chu eden vanga an sual kha Isua thisen a silfai an nih loh vang a ni, mihring thianghlimloh avang a Pa angchhung Eden atang hnawhchhuah tawh te hi chu thawhlehna ( taksa) awm hma hi chu engemaw ah ber an thlarau pawh hrem anih ka ring. Isua khan a bul a an khenbeh kha Pa angchhungah a chawlhpui a, mahse taksa thawhlehna angah chuan a thawhpui lo ni awm tak a ni. Taksa thawhlehna hi chu nakin a lo la awmtur anih rinna hi zirtirna hrisel zawk niin ka hria. Vanram inlarna tamtak hmu inti ho ai hi chuan Bible thusawi tum hi enge tih zirchian a tha khawp in ka hria. Ka thusawiah hian diklo lai a awm anih chuan min lo hrilh dawn nia. 

Taksa thawhlehna a awmlo tia zirtirna hi Bible in a khap a, mi an thih in an taksa a tawihral bawk si thin a, hetiang anih chuan engtinnge thawhlehna a awm theih ang. Tawihral tawh pawh nise a petu chuan tisa ah a din leh thei a ni. Ezekiela kan chhiar chuan ruhro mai pawh kha thli hmang a taksa pu in sipai rual ropui takah a dintir thei tlat a ni. Eden bawhchhiatna avang khan kan taksa hi tawihral ngei ngei tur a ni. Mahse nikinni a kan taksa tur chu tihanglam a ni tawh dawn a, khawih theih, pianhmang nei, nunna nei, thil pawh ei thei, mahse thianghlim vantirkoh ang, nupui pasal pawh innei hran lova hmana Eden a sual luh hma a inkawm ang khan mipa leh hmeichhia kan inkawm leh dawn a ni. Chu hmun chu chu Eden hmasa ai khan a ropui zawk fe dawn a ni. Nupa a awm tawh dawn loh avangin kan lo lungngai lawk a nimai thei, hetiang hian ngaihtuah teh ang, unau mi 3 lek inlungrual a awm pawh nuam kan tih chuan a sang rual lai inhmangaih taka han inkawm ho dial dial chu a nuam awm hle mai. Vanram kai hun chuan vegetarian kan nih hmel hle mai, h lui kam atang hian lo thlir phawt ang u.

Chutih hun ah chuan ni bik serh hran a ngai tawh lovang. Hei hi a chhan chu hnathawh reng a awm tawh dawn loh vang a ni. Nitin in Pathian nen kan inpawl leh anga, eden hmasa a thlemtu ang kha a awm tawh dawn loh avangin 100% in a secure zawk a ni. Eden bawhchhiatna avangin thupek tamtak pak a ni a, inthat fo thin kan nih avangin vengte hmangaih tur a tih kan ni thin. Mahse kha thupek kha hman a ngai tawh dawn lo, practice na hmun a nih tawh dawn avang a ni. Investment ti chuan kan hria anga security chungchang a that leh thatloh kan va invest na tur kha kan chhui chiang thin a ni. Mahse vanram hi chu a security a lo tha khawp mai, Eden hmasa kha chu security khata tha em em lo a, chuvangin sual pawh kha lo lut thei a ni. Mahse hetah hi chuan sualna chi reng reng a awm tawh dawn lo a ni.

Remna kan zawng thin a, remna leh muanna duh avangin ram tamtak an indova, mitamtak remna duh avangin an inthat thin. Mahse chung hmun ah chuan remna tak a thleng ngai lo chu a nih hi. Chu hmun ah chuan sual a awm tawh dawn loh avangin a ralmuang tawh dawn a ni. Ralmuang hmun ah pawh hian muanna awmlohna hmun a awm tho thin inngeih vaklohna hmun te, i hlauthawng em chu chuan. Mahse chutah chuan inngeihna awmtirtu ama nunna thapa inngeihna ram a hruailuttu kaihhruaina hmun anih avangin inngeihlohna a awm tawh dawn lo a ni.

Thuthlung thar

Ngaihtuah zui a tan
Pathian ti thinurin Israelte Pathian lakah an hel a. An chungah Pathian a thinur hle anih kha, a zawlneite hmangin a hremtur thu leh sim tur in a ti nasa khawp mai. Amaherawh chu an sim duh lo. An sual zui zel avangin Pathian chuan hrem a tum ta a, mahse an tawrhtur a ngaihtuahin kir leh se tih a duh bawk si avangin chance dang a pe thin a. A tawpah chuan Babulon kutah a hlan ta a ni. Hemi hnu pawh hian last chance ala pe tho a nia mawle, inpe te chu an him tur thu a hrilh anih kha. Mahse amite tawrhna a nasa dawn tih a hrereng a, chutiang khawp a tuar nasa chu an tawrhna avangin an beidawng ang tih a hlau em em lawi si a, he thu hi a sawi ta a ni. Jeremia bu ah khan kan hmu thei ang a, hetiang khawp hian animaw Pathian in a duhlai te hi alo hmangaih le, thlirzui ang aw......

Pathian mite la hamthat turzia.
Ngaiteh nite chu alo thleng dawn, tih hi Lalpa thuchhuak a ni: chung ni ah te chuan Israel chhungte leh Juda chhungte hnenah chuan thuthlung thar ka siam ang. Jeremia 31:31

A chung kan en khian eng thuthlung nge nge an dawn tur tih hi hriat ava chakawm em. Abrahama leh Mosia lakah thuthlung an dawng tawh tih a lang a, hemi hma hian a hmaa mi ho ah hi chuan dan inzirtir ngai chawp a zawm chi a ni palh em ni an zawm theihloh a, a siamsaktu pawhin hman reng chuan a rilru ana zel dawn tih a hriat avang a, a thar hlak a thlak a tum chhan ni ang le. Lo chhiar thla teh ang aw...

' An thlahtute Aigupta ram atang a hruaichhuak tura an kut ka chelh ni a ka thuthlun ang kha ni lovin, an tan hotu ka ni chungin chu ka thuthlung chu an bawhchhia a, tih hi Lalpa thuchhuak chu a ni. Jeremia 31:32

Kha alo chiang deuh ta mai, a chungah khan kan sawi chhunzawm ang a. Israel fate kha thilmak tamtak tihsakin a kaihruai hlawm a, a chawm ringawt mai anih kha. Kutchak takin kaihruai mahse a kut ata an pitchhuak leh thin a, Lalpa chuan a man lui leh a, inhmuhchhuahna atan salah te a tantir thin anih kha. Khang kha a sawtlo tih a hre ta a ni. Dan thar thuthlunna neih a tum ta a ni. Thu thlung turin mi pakhat chauh chuan a theihloh tih kan hriat a tha awm e. A thuthlun tur hi engtiang a ropui nge ni ang.

' Chung ni hnu a Israel chhungte hnen a thu ka thlun tur erawh chu heihi a ni, tih hi Lalpa thuchhuak a ni: an chhungril ah te ka thupek ka dah ang a, an thinlung ah ka ziak bawk ang a, kei hi an Pathian ka ni ang a, anni chu ka mi te an ni ang; tumahin 'Lalpa hre rawh' tiin mahni thenawm te leh mahni unau an zirtir dawn tawh lova; a te ber atanga a lian ber thleng in an za in mi hre theuh dawn si a. Jeremia 31:33

Kha le a thuthlung tur chu alo puang lawk ta a ni. An thinlungah Pathian hmangaihna a puttir tawh dawn a, chu chu tumahin an sawhsawn sak thei tawh dawn lo a ni. Ava ropui tehlul em. He thutiam hi tihlawhtlingin kalvary tlangah chuan saui min tansak ta rup mai a ni. Inthawina atan chuan a nun a mi pawimawh ber mai, van fapa mal duatlai, Lal Isua chu kan tan a lo tir ta a. Thuthlung thar chu a ni hi hi Pathian fapa thisen hi kan tan ava hlu tak em. Hengte avang hian kan sualna te chu Lalpa chuan a hre reng duh ta lo a ni. Kan sual a hriatchhuah pawhin a fapa tuarlai natzia a hrechhuak thin tawh dawn a ni. Bible kan chhiar hian mihringte an sual avang a an tuar lai hi Pathian hian hmuh nuam a ti hauh lo mai a, min lo hmangaih em a ni. Chuvangin he a thuthlun thar kan Lalpa Isua Krista hmang a min pek hian thlarau thianghlim hmangin i thinlung kawngkhar a kik thin a, luh a tum thin a ni. Lalpa chuan a thutiam angin i thinlung chhung ngei ah khan a thu nung chu dah a duh a ni. LO pawm ve mai ta che, a hmangaihna a thuk em mai. Pathian in i boral a phal mawlh lo, a hmangaih che.

Kum tamtak chhungin bosan tawh mahla
Ala nghak reng che engah nge i muan
A thisen a tlansa i ni alawm
A khawngaihna zia che sawisen a ni lo